“Trupat paqeruajtëse amerikane në Kosovë janë të pajisura mirë dhe të gatshme për të parandaluar dhunën në veri të vendit”. Kështu ka deklaruar komandanti i ushtarëve amerikanë nga Garda Kombëtare e Ushtrisë së Teksasit, Ross Walker në një intervistë për Reuters.
NATO ka përforcuar praninë e saj në Kosovë me 1 mijë trupa të tjera, pas sulmit të 24 shtatorit në Banjskë ku mbet i vrarë polici Enver Zymberi.
Më shumë se 570 ushtarë amerikanë shërbejnë nën misionin e udhëhequr nga NATO, i cili në total ka rreth 4 mijë e 500 trupa të dislokuara.
“Ne jemi të përgatitur mirë, të trajnuar mirë dhe të pajisur për të reaguar ndaj çdo gjëje që mund të ndodhë këtu tani”, ka thënë kolonel Ross Walker, transmeton Telegrafi.
Disa nga ushtarët amerikanë janë të vendosur në kampin Nothing Hill afër qytetit verior të Leposaviqit dhe rrugëve të patrullimit që lidhin Kosovën dhe Serbinë.
Ata i parkojnë kamionët e tyre të bardhë të paarmatosur afër kufirit me Serbinë dhe më pas ecin pranë hekurave metalike që deri vonë mbanin tabela që sinjalizonin vijën kufitare ndërmjet Kosovës dhe Serbisë.
Ata patrullojnë në këmbë dhe mbajnë vetëm pistoleta, shenjë se gjërat kanë qenë të qeta kohët e fundit. /Telegrafi/
Wird geladen ...
