Shefi i asamblistëve të Partisë Demokratike të Kosovës në Komunën e Prishtinës, Leutrim Retkoceri ka bërë të ditur se të enjten do të bëjnë anulimin e këmbimeve të jashtëligjshme në Badovc.
Retkoceri në një postim në Facebook shkruan se interesi i publik i qytetarëve të Prishtinës do të triumfojë mbi interesin e pronarëve të tokave dhe larjes së borxheve biznesore.
“Pasnesër përfundimisht do të bëjmë anulimin e këmbimeve të jashtëligjshme në Badovc të Kryetarit Përparim Rama.
Interesi i publik i qytetarëve të Prishtinës do të triumfojë mbi interesin e pronarëve të tokave dhe larjes së borxheve biznesore”, shkruan ai.
“Shpronësimi milionësh në dëm të qytetarëve dhe komunës do të ndalet përfundimisht pasnesër”, shkruan më tej.
Ndryshe, tashmë është bërë publike “krisja” ndërmjet LDK-së e PDK-së në kryeqytet. Kryetari i Komunës së Prishtinës, Përparim Rama, ka marrë vendim për ristrukturim të kabinetit qeverisës të kryeqytetit.
Ai fillimisht liroi na detyra drejtorin e Shërbimeve Publike, Ilir Musliu. Pas Musliut, Rama njoftoi edhe për shkarkimin e nënkryetares Donjeta Sahatçiu, e cila vjen nga radhët e PDK-së. /Telegrafi/
Wird geladen ...
